Назарэўскі Барыс Васільевіч, 1902 года нараджэння, медыцынскі фельчар, мясцовы патрыёт, які працягваў працаваць у медыцынскай амбулаторыі ў час нямецкай акупацыі.
Ён перадаваў медыкаменты партызанам праз іншых мясцовых жыхароў.

Намеснік (дзяржаўца), у часы Вялікага Княства Літоўскага ім з’яўляўся прадстаўнік вялікага князя, якому належыла адміністрацыйна-гаспадарчая, фінансавая, судовая ўлада ў пэўнай мясцовасці; з’яўляўся камандуючым мясцовых узброенных аддзелаў.
У XVI-XVII стагоддзях атрымаў статус памочніка старасты і ваяводы з прыкладна такімі ж функцыямі ў паветах і ваяводствах.
У Расійскай імперыі – пасадавая асоба мясцовага кіравання.
Галоўчынскі князь Мацвей Мікіцініч з’яўляўся намеснікам князёўны Алены Іванаўны (жонкі Вялікага князя ВКЛ Аляксандра) у Магілёве, Княжыцах, Цяцерыне, Бірштонах.

Народнае вучылішча, (пачатковая школа).
Пачалі засноўвацца на Беларусі з 1862 года.
Адкрыліся ў Бялынічах і Галоўчыне (1864), Нежкаве (1879).
Пры народных вучылішчах меліся бібліятэкі. А па нядзелях альбо вечарам у буднія дні настаўнікі праводзілі чытанні, ў асноўным, твораў мастацкай літаратуры для ўсіх жадаючых.

Ніжняя Спасаўшчына, вёска ў Галоўчынскім сельсавеце.
Далучана да Галоўчына ў сярэдзіне ХХ стагоддзя.

Новая Сакалоўка, пасёлак у Галоўчынскім сельсавеце.
Арганізаваны (1922) калгас «Новая Сакалоўка» (тадышняя Нежкаўская воласць) – адзін з першых на Бялыніччыне. Першапачаткова аб’ядноўваў 8 сем’яў, валодаў 45 дзесяцінамі ворнай зямлі.
Пасёлак выключаны (1970-я) з уліковых дадзеных.