Чабатаршчына, вуліца Галоўчына, на якой жылі чабатыры (людзі, якія шылі абутак).
Вуліца ідзе ў напрамку на Круглае.

Чамберс, генерал, які ўдзельнічаў у бітве рускага войска са  шведамі ля вёскі Галоўчын.
За страты, якія панеслі рускія войскі ў час Галоўчынскай бітвы, ён, як і Рапнін, быў разжалаваны ў радавыя і павінен быў вярнуць у казну суму грошай, роўную ўрону.

Чарвякоў Аляксандр Рыгоравіч (1892-1937), нарадзіўся ў вёсцы Дукора Пухавіцкага раёна.
Дзяржаўны і партыйны дзеяч Беларусі. Старшыня ЦВК і СНК БССР (1924-1937).
Летам 1924 года наведаў месца пракладкі канала членамі меліярацыйнага таварыства «Васількі», сельскагаспадарчае таварыства «Север» у аднайменнай вёсцы Галоўчынскага сельсавета.
Падпісаў (19 снежня 1924) пастанову ЦВК БССР аб узнагароджванні таварыства «Васількі» ордэнам Працоўнага Чырвонага Сцяга за №1.  

Чарнушка, зараз роў, раней ручай, рачулка, дзе паілі скот.
Рачулка упадала ў Рудзянку, па берагах, якой былі расліны з чорнымі зярняткамі падобнымі на насенне маку.

Чашнік, урад (пасада) у ВКЛ. Павінен быў наліваць вялікаму князю ВКЛ напоі ў посуд, што падносіў да гаспадара падчашы.
Пасада вядома з 1409. Пры двары вялікага князя Аляксандра (1492-1506) было некалькі чашнікаў. З цягам часу пасада ператварылася ў намінальную. У паветах існавалі павятовыя чашнікі.
З XVII стагоддзя ўсталявалася польская форма назвы пасада - чэснік.

Чорная вада, балоцістая мясцовасць вышэй ракі Чарнушкі побач з Казённым лесам.

Чыжэўская Вольга Васільеўна, працавала галоўным аграномам калгаса «Наша перамога».
Узнагароджана ордэнамі Працоўнага Чырвонага Сцяга (1971), «Знак Пашаны» (1982).

Чыстае балотца, балота паміж Сіваямі і Будкамі ў якім была чыстая крынічная вада.

Чэснік, гл. Чашнік