VІІ ст. да н. э. На землях, якія займае сённяшні Галоўчын пасяліўся чалавек у эпоху ранняга жалезнага веку.
1071 год. Бітва каля Галацічаска (Галоўчын?). Полацкі  князь Усяслаў Чарадзей быў разбіты Яраполкам Ізяслававічам - князем Уладзіміра-Валынскім і Тураўскім .
1433-1440 год. Вялікі князь Вялікага Княства Літоўскага Жыгімонт Кейстутавіч дорыць Галоўчын Самойлу.
1468 год. Была састаўлена Дарчая грамата Іванам Юр’евічам Мсціслаўскім Ануфрыеўскаму манастыру (пабліз Мсціслава), у якой упершыню згадваецца сяло Галоўчын.
ХY стагоддзе. Будаўніцтва Галоўчынскага замка.
1501 год. Вялікі князь Вялікага Княства Літоўскага Аляксандр дорыць Галоўчын сваёй жонцы Алене (дачцэ маскоўскага цара Івана ІІІ).
1509 год. Алена перадорвае Галоўчын Мацвею Мікіцінічу, заснавальніку рода князёў Галоўчынскіх.
1539 год. Памёр Мацвей Мікіцініч, уладальнік Галоўчына.
1571 год. Падзел уладанняў Мацвея Мікіцініча паміж яго сынамі Шчасным і Яраславам. Першаму дастаўся Галоўчын, а другому Княжыцы. Межавая лінія праходзіла па рэчцы Вабіч.
1584 год. Галоўчын пазначаны як горад поруч з Оршай, Копыссю і Шкловам.
1587 год. Чарговы запіс у «Баркулабаўскім летапісе» пра Галоўчын.
1630 год. Удава Яна Галоўчынскага прадае сваё закладное на маёнтак Галоўчын за 240 тысяч злотых удаве Мікалая Слушкі Альжбеце і яе сыну Аляксандру.
1636 год. Алена Галоўчынская ахвяруе на патрэбы Галоўчынскага кальвінскага збору 2 тысячы злотых.
1647 год. Князь Багуслаў Радзівіл у сваіх «Запісках» паведамляе, што ў Галоўчыне маецца 5 храмаў, 2 школы, а ў замку ўзведзена яшчэ адна Быхаўская брама.
1654 год. Штурм і спаленне рускім войскам Галоўчына. Загад цара ваяводу Трубяцкому аб вывазе з Галоўчына ў Смаленск званоў, металу, лекаў, дактароў.
1678 год. Праз Галоўчын праязджае дварэцкі М.Чартарыйскага, пасол Рэчы Паспалітай у Расеі Бернгард Танер.
1681 год. Заснаванне Галоўчынскага дамініканскага касцёлу, які дзейнічаў да 1832 года.
1698 год. Праездам Галоўчын наведвае сакратар пасольства Свяшчэннай Рымскай Імперыі, аўтар «Дзённіка падарожжа ў Масковію» Іёган Георг Корб.
1708 год. Бітва рускага войска са шведскім на чале з Карлам ХІІ каля Галоўчына (Галоўчынская бітва). Галоўчын падвяргаецца спаленню. Разбураны замак не аднаўляўся.
1752 год. Антоні Пац выкупляе за 50 тысяч злотых закладное права на Галоўчын у Антонія, Міхала, Францішкі, Ежы,Станіслава Патоцкіх і становіцца адзіным уладальнікам гэтага маёнтка.
1772 год. Уладальнік Галоўчына, пісар Вялікага Княства Літоўскага Антоні Пац адмаўляецца прысягаць на вернасць расейскай царыцы Кацярыне ІІ. Маёнтак канфіскаваны.
1782 год. Закрыты Княжыцка-Галоўчынскі ўчастак паштовай дарогі Магілёў-Вільня.
1794 год. Кацярына ІІ падпісала ўказ аб увядзенні мяжы габрэйскай аседласці ў беларуска-літоўскіх, украінскіх губернях. Прымусовае перасяленне габрэеў у Галоўчын.
1812 год. Партызанскі атрад Дзяніса Давыдава таемна спыняецца ў Галоўчыне.
1833 год. Перахрост  Галоўчынскага дамініканскага касцёла ў Прэабражэнскую царкву.
1864 год. Пачынае дзейнічаць Галоўчынскае пачатковае вучылішча (зачынена 1873).
1883 год. У Галоўчыне адкрыта школа ў спецыяльна пабудаваным для яе памяшканні.
1912 год. Пабудавана тэлефонная лінія Нежкаў-Галоўчын. У Галоўчыне ўстаноўлена цэнтральная тэлефонная станцыя.
1921 год, 21 лістапада. Нарадзіўся акадэмік М.М.Севярнёў (пасёлак Север Галоўчынскага сельсавета).
1923 год. У Галоўчыне пачынае працаваць хата-чытальня.
1924 год. Меліратыўнае таварыства «Васількі» (Галоўчынскі сельсавет) узнагароджана ордэнам Працоўнага Чырвонага Сцяга БССР №1 (устаноўлены 10 кастрычніка).
1924 год. Нарадзілася В.В.Буякова (вёска Забалацце) - Герой Сацыялістычнай працы (1966).
1928 год. У Галоўчыне пачынае дзейнічаць сыраробная майстэрня.
1930 год. Стварэнне калгаса «12 год Кастрычніка» з цэнтрам у Галоўчыне.
1944 (чэрвень). Гітлераўцы адступаючы спалілі 178 галоўчынскіх двароў, знішчылі 201 жыхара вёскі.
1944 27 чэрвеня. Пры вызваленні Галоўчына смяротна паранены старшы лейтэнант С.Р.Церашкевіч (званне Героя Савецкага Саюза прысвоена 24 сакавіка 1945 года).
1948 год. Жыхары Галоўчына звяртаюцца з адкрытым лістом да сваіх землякоў з просьбай дапамагчы аднавіць вясковую бібліятэку.
1996 год 29 верасня. Урачыстае адзначэнне 925-гадовага юбілею Галоўчына.
1999 год. Група сяброў культурна-асветніцкага ордэна караля Карла ХІІ (Швецыя, Стакгольм) упершыню наведвае Галоўчын.
2008 год. Пры ўездзе ў вёску з боку Магілёва, з лева ад шашы на Круглае пастаўлены мемарыяльны знак на ўшанаванне памяці воінаў, палеглых у Галоўчынскай бітве (4 ліпеня 1708 год).
2008 год. Галоўчын набывае статут аграгарадка.